دكتور على نفسك

 

دكتور على نفسك

الاوهام والخرافات فى الطب-والاستسلام للمتفق عليه حتى ولو غلط- هذة الاوهام-هى نابعة من مشاكلنا الفكرية المزمنة- كما فى باقى نواحى حياتنا

خد عندك مثال

بعض المرضى بيموتوا فى حكاية اكل التوم ع الريق عشان مرض الضغط

وبعض الاطباء مابيحبوش يزعلوهم ولا يشككوا فى ايمانهمويقولوا لهم اه كويس

والحقيقة ان تمن علبة التوم- حبوب بيطلع منها عمولة للدكتور فى بعض المناطق

ولو قعدت سنة تقول للمريض- ياحبيبى التوم ماينفعش كعلاج معيارى لمرض الضغط-وانه لازم تاكل كيلو توم كل يوم عشان ضغطك200 على 120

مفيش فايدة

بيعتبرك انك خارج عن الايمان ومشكك وبتثير الفتن

دكاترة كتير بيستسهلوا ويقولوا للعيان كل توم بس قوم روح وخلصنا

وابقى اشرب كركديه كمان

وكل اكل بدون اى ملح

ونام على حنبك اليمين وكل حبة البركة

كل دى حاجات حلوة- بس مش علاج معيارى لمرض الضغط

هنا انت بتهدر كل قيم الطب والعلم  والتفكيرالحديث اللى معياره القياس والوحدات والتجربة العلمية الاحصائية

المريض بيقعد يخلى  زوجته تطبخ له اكل مخصوص بدون ملح وبيقعد ياكل منه وهى بتبقى مبسوطة رغم العبء لانها جعلت حياته مرة–لغاية ماييجى يوم ويروح يشترى 2 كيلو رنجه- وفسيخ وياكلهم مرة واحدة

الطب الان اصبح بيقول انك تاكل اكل البيت العادى بس ممنوع اضافة ملح من الملاحة على السفرة وممنوع اضافة ملح كالمخلالات وغيرها-اطبخ عادى بس حط الملح فى نهاية الطبخة مش من الاول -كده هتستخدم كمية اقل

يعنى المطلوب هو الاقلال من الصوديوم خلال حياتنا كلها مش بس المملح عندما يجيلنا الضغط

heartdisease.about.com/cs/hypertension/a/saltwars_2.htm – 22k

الطب بيقول ان منع وتحديد كمية الصوديوم بتبقى مطلوبة فى حالات محددة جدا زى الفشل الكلوى قبل الغسيل مثلا

لان المقصود هو الصوديوم مش الملح بس

يعنى الصوديوم الموجود فى الخبز-مثلا- حتى لو انت مش حاسس بطعم الملح بيقى محسوب

والصوديوم اللى فى علبة عصير محفوظة- معلبات- كماده حافظة اكتر من حفنة ملح مع ان العصير طعمه مش مالح

لكن تقول لمين

انت عاوز تفهمنى ان العصير الحلو ده فيه ملح

ولو قلت كلام زى ده للمريض بيعتبرك كافر

لان  انا اول مرة اسمع دكتور بيقول كده

دكتور هو انت شيوعى لامؤاخذة

المريض بيحب الاساطير والكلام الفارغ وان الدكتور يقول له الكلام اللى بيحب يسمعه

وفيه فرق بين استخدام رشيد للملح- مع تقليل الصوديم من كافه مصادره وفيه فرق بين انك توهم المريض انه ياكل بدون ملح والمريض بيقى مبسوط قوى قوى- الدكتور قالى كده

المرضى بيحبوا قوى  كده

وطبعا كتير من الاطباء مش ناقصين وجع دماغ ومناقشات والمريض يخرج مقتنع ان الدكتور ده ياما حمار ياما مجنون

وان دكتور معتز خلة اللى فى العيادة المنافسة -يقول للمرضى اصل ده مثير للفتن

التوم حلو والكركدية حلو والفيل وحش

وهنفضل كده نموت فى الهجايص والمالوف والمكرر لغاية مانموت

——————

عبد الجليل

شفت بقى انا احسن انى لا اكتب فى الطب

بالطريقة دى احسن متكتبش فى اى حاجة

او اكتب وانت ساكت زى ماواحد طلب منى قبل كده

——————————————————

 ومع التحفظ على الجزء العلمى-فى المقال ده واللى لسه برضة انا مش مرتاح لصياغته- من حيث تاثيره على القارئ- هيفهمه ازاى-يعنى هيستخلص منه ايه

لكن—————————-

اللى عاوز يتابع الديلما دى

يبحث على النت

SALT  RESTRICTION HYPERTENTION

حتلاقى خناقة ياباشا بس من غير شتائم زى عندنا

وفى امور كتيرة صراعات فكرية

لكن متلاقيش حد بيقول

الفتنة نائمة وظابطه المنبه على 8 ونص لعن الله من ايقظها

ولا هيهات ايها الرويبضة- انت بتتكلم عن الملح وتقصد السخرية من حبة البركة وهدم الاسلام

ولا القافلة تسير والصوديوم يعوى

ولا لايقذف بالحجارة الا الشجر المتخلف

ولا حاجيب لك امن الدولة

ولاهاضربك بالجزمة ياناصر ياهاكر